ركبت عربيتي وروحت عند ماما، وأول ما فتحتلي الباب وشافتني شايل شنطة هدومي، اتخضت وقالت:
\- إيه ده يا حبيبي؟ إنت جايلي بشنطتك ليه؟ حصل إيه؟ وإيه اللي جابك من بيتك في الوقت ده؟دخلت وحطيت الشنطة على الأرض، وقلت بعصبية:
\- اسألي جوزك يا ماما، هو اللي طردني من بيتي!ماما بصتلي بصدمة وقالت:
\- طردك؟! طردك إزاي يعني؟ هو إنت عملت إيه؟!حكيتلها كل اللي حصل، من أول ما أبويا جه واتخانق معايا عشان طلقت شروق، لحد ما فاجأني إن الشقة مكتوبة باسمها، وإنه طلب مني ألم هدومي وأمشي عشان هي صاحبة البيت.
ماما كانت بتسمعني وكل شوية ملامح وشها تتغير، ولما خلصت كلامي قامت من مكانها وقالت بغضب:
\- إيه الكلام الفارغ ده؟! يعني إيه يكتب الشقة باسم البنت من ورايا ومن وراك؟! وإزاي يعمل فيك كده؟! ده ابنه، مش واحد غريب عنه!
قلت وأنا متعصب:
\- هو ده اللي حصل يا ماما، وأنا لحد دلوقتي مش قادر أصدق إنه عمل فيَّ كده. أنا كنت فاكر إن الشقة بتاعتي، وكنت مرتب كل حاجة عشان أجهزها وأتجوز هنا، دلوقتي مش عارف أعمل إيه!ماما مسكت موبايلها وقالت:
\- أنا مش هسكت على اللي عمله ده، ده فاكر نفسه هيقرر كل حاجة لوحده؟! أنا هكلمه وأفهمه إنك ابنه، وإنه مينفعش يذلك بالشكل ده!حاولت أهدّيها وقلت:
\- يا ماما بلاش مشاكل دلوقتي، أنا مش ناقص. لكن هي ما سمعتش كلامي، واتصلت بأبويا، وأول ما رد عليها بدأت تتكلم بصوت عالي:
\- إنت عملت إيه في ابنك يا راجل؟! إزاي تطرده من بيته وتخليه ييجي عندي بشنطة هدومه؟! وإزاي تكتب الشقة باسم بنت عمك من غير ما تقول لمراتك ولا لابنك؟!سمعت صوت أبويا من الناحية التانية وهو بيرد بهدوء في الأول:
\- الشقة دي أنا اللي اشتريتها بفلوسي، ومن حقي أكتبها باسم اللي أنا شايف إنه محتاج ضمان لمستقبله. ماما ردت بعصبية:
\- ضمان إيه ومستقبل إيه؟! دي كانت جوازته، وكان المفروض الشقة تبقى ليه، مش تكتبها باسم مراته وتخبي علينا!
أبويا قال بحزم:
\- هو كان المفروض يحافظ على مراته، مش يستغل إنها معندهاش قايمة ويطردها من البيت. أنا كتبت الشقة باسم شروق عشان أحميها من اليوم اللي يحصل فيه اللي حصل النهارده، وطلع عندي حق. ماما صرخت فيه:
\- يعني إنت شايف إن ابنك يتبهدل عادي، المهم بنت عمك تبقى مبسوطة؟
! طب ما هو طلقها، خلاص، كل واحد يروح لحاله، إيه لازمة إنك تطرده هو كمان؟!رد أبويا:
\- أنا ما طردتوش من بيتي، أنا طلبت منه يسيب شقة مش ملكه. هو لو عايز يتجوز، يتجوز، محدش منعه، لكن مش على حساب حق شروق.
ماما فضلت تتكلم وتلومه، لحد ما أبويا فقد أعصابه وقال:
\- أنا مش هفضل أسمع الكلام ده! إنتوا الاتنين مش شايفين غير مصلحتكم، ولا واحد فيكم فكر إن فيه بنت اتظلــ,,ـــــمت واترمت من بيتها بعد سنين جواز.
وإنتِ بدل ما تنصحي ابنك وتفهميه غلطه، جاية تلوميني أنا عشان حاولت أحمي حق البنت!وبعدين قفل المكالمة في وشها. ماما كانت هتتجنن من الغضب، ورمت الموبايل على الكنبة وقالت:
\- شوفتي قلة الذوق؟! يقفل السكة في وشي أنا؟! ده أنا مراته وأم ابنه!بصيتلها وقلت:
\- خلاص يا ماما، سيبيه، أنا مش عايز مشاكل أكتر من كده. لكنها ردت بعناد:
\- لأ، أنا مش هسيب حقك يضيع! إنت ابني، ومش هسمح لأبوك يذلك بالشكل ده. وقتها حسيت إن ماما مش شايفة إني غلطت في حق شروق، كل اللي شاغلها إني خرجت من الشقة، وإن أبويا وقف ضدي.
Amany sayed mohamed موثّق ✦ ناشر
كاتب
كاتب إخباري وقاصّ وروائي — أشارككم أهم الأخبار وأمتع القصص والروايات.
أكتب بشغف ما يستحق القراءة — تابعوني ليصلكم كل جديد.
النقاش
التعليقات والردود (0)
سجّل الدخول للمشاركة في النقاش. تسجيل الدخول
لا توجد تعليقات بعد — كن أول من يشارك رأيه.